Ish-ministri i Jashtëm, Ditmir Bushati ka reaguar pas fitores së Lëvizjes për Vetëvendosje në zgjedhjet parlamentare të Kosovës.
Në një postim në Facebook Bushati shkroi se Albin Kurti dhe Vjosa Osmani e LDK i dhanë oksigjen Kosovës duke mos u bërë palë me veset e jetës politike.
Deputeti socialist tha se ata janë përpara një përgjegjësie historike për ta drejtuar Kosovën me dinjitet drejt sfidave të shtetkonsolidimit demokratik dhe partneritetit me botën demokratike.
“Albini dhe Vjosa i dhanë oksigjen Kosovës në opozitë duke demonstruar konsistencë e pathyeshmëri e duke mos u bërë palë me veset e jetës politike që dobësojnë idealin e jetës demokratike. Është kjo arsyeja që sot ato shihen si projekt shprese për të gjithë shqiptarët në rajon, duke na dëshmuar se mund të triumfohet mbi rrënojat e së vjetrës.
Tanimë Albini dhe Vjosa janë përpara një përgjegjësie historike për ta drejtuar Kosovën me dinjitet, dashuri e përkushtim drejt sfidave të shtetkonsolidimit demokratik dhe partneritetit me botën demokratike. Ata kanë përgjegjësinë për të jetësuar besimin e qytetarëve të Kosovë”, shkruan ish-ministri i Jashtëm.
Bushati shtoi se përtej fitores së Kurtit dhe Vjosës, në Kosovë fitoi standardi dhe kultura demokratike.
“Kosova, një dekadë shtet, na dha mësime të vlefshme, edhe pse ne e kemi lënë pas një shekull shtet. Në demokraci zgjedhjet janë garë vlerash dhe jo të fortësh. Partitë politike i nënshtrohen konfirmimit të vendimeve nga populli, ku qytetarët kanë mundësi të rëndisin të preferuarit e tyre në listat e kandidatëve për deputetë, çka forcon kontrollin demokratik ndaj vendimmarjes.”, shkruan Bushati.
g.kosovari
