Ftesa që NATO i bëri Shkupit për të nisur bisedimet për anëtarësim është me rëndësi për rajonin tonë dhe rikonfirmon politikën e dyerve të hapura. Aleanca njeh dimensionin strategjik të Ballkanit Perëndimor.
Ministri për Europën dhe Punët e Jashtme, Ditmir Bushati, u shpreh në një intervistë për RTSH-në se “në këtë samit mendoj që përsa i përket rajonit tonë është me rëndësi të theksojmë ftesën që Aleanca i bëri Shkupit për të filluar bisedimet për anëtarësim dhe thirrjen që i bën Aleanca Shkupit për të ndërtuar një shoqëri multietnike në përputhje me frymën e marrëveshjes së Ohrit”.
“Në fakt ka qenë insistimi i Shqipërisë që në 2014-ën për të pasur një vëmendje të posaçme tek elementi i ndërveprimit dhe harmonisë ndëretnike dhe jemi të gëzuar që fqinji ynë do të fillojë këtë rrugë. Jemi të inkurajuar nga reformat që janë ndërmarrë deri tani dhe shpresojmë që nuk do të jetë ditë e largët kur edhe ajo që do të quhet në të ardhmen Maqedoni e Veriut do të bëhet pjesë e aleancës. Gjithashtu Aleanca njeh dimensionin strategjik të Ballkanit Perëndimor dhe vlerëson edhe ambiciet e Kosovës për një raport më të ngushtë me të”, tha Bushati.
ma.me
