Viti 2018 ka shënuar një rekord denoncimesh, për dhunën në familje.
Më të prekurat nga dhuna në familje vijojnë të mbeten gratë dhe vajzat, ku 1 në 3 gra në vendin tonë vijon të dhunohet, shifër kjo alarmante.
Vetëm në vitin 2018 sipas Institutit të statistikave, policia ka evidentuar 4411 raste të dhunës në familje, e thënë ndryshe, janë regjistruar çdo ditë mesatarisht 12 raste të kësaj forme dhune.
Sipas përllogaritjes së të dhënave, në katër vitet e fundit, rastet e denoncimit të dhunës në familje janë rritur me 28%, pra 963 raste më shumë të evidentuara nga policia, po të krahasojmë 2015 më vitin e shkuar.
Por, ky numër në rritje i rasteve të regjistruara nga policia, ka sjellë edhe një numër më të lartë të autorëve të dhunës në familje. Nga viti 2015, në 2018-ën, janë regjistruar 29% më shumë autorë përgjegjës.(Dritare.net)/l.m
