Avokati Besnik Muçi ka komentuar ndryshimet e miratuara së fundmi në Kodin Penal, duke theksuar se ato kanë ndikim të drejtpërdrejtë tek qytetarët dhe duhet të diskutohen hapur.
Në emisionin “Trialog” në RTSH, Muçi u shpreh se Kodi Penal nuk funksionon si ligjet e zakonshme, që mund të ndërhyjmë sa herë të duam.
“Kodi Penal nuk është si ligjet e zakonshme që mund të ndërhyjmë sa herë të duam. Ndryshimet janë të rëndësishme dhe duhen diskutuar, në mënyrë që qytetarët t’i njohin. Kur një person parkon gabimisht dhe shkon në burg, mund të thotë: ‘Unë nuk e dija që kjo ishte vepër penale’. Prandaj, ndryshimet duhen diskutuar”, tha ai.
Ai komentoi gjithashtu edhe pjesën e Kodit Penal që lidhet me narkotikët, duke theksuar se ka disa përvoja të mira nga vendet europiane, por sipas tij, ndryshimet e propozuara në vend nuk kanë shumë vlerë, për shkak të mungesës së guximit politik.
“Pjesa që lidhet me narkotikët ka disa përvoja shumë të mira nga Europa, por ne bëjmë vetëm disa ndryshime të vogla, me jo shumë vlerë, pasi nuk ka guxim politik për ndryshime më të thella”, tha avokati.
Kuvendi miratoi me 85 vota pro ndryshimet në Kodin Penal. Ndër vendimet kryesore, u aprovua dekriminalizimi i shpifjes për gazetarët dhe ashpërsimi i masave për parkimin dysh. Në Kodin Penal parashikohet gjobë dhe deri në 1 vit burg për parkim dysh, ndërsa dekriminalizimi i shpifjes i jep imunitet gazetarëve për veprën penale të shpifjes.
