Shumë komente pas lajmit për dënimin e një mamaje shqiptare, myslimane, e cila they ligjin, pasi nuk hoqi ferexhenë gjatë një mbledhjeje komunale në Pordenone. Mediat italiane raportojnë se gruaja myslimane, banore në Itali prej vitesh u dënua me katër muaj burg, të cilat gjykata ia konvertoi në një gjobë 30 mijë e 600 euro. Argument për dënimin e saj u citua artikulli pesë i Kushtetutës italiane. “Ndalohet mbajtja e çdo lloj mjeti në ambiente publike, të cilat bëjnë të pamundur identifikimin e një personi”, lexoi akuza në gjyqin ndaj saj.
Por avokati e quajti të padrejtë, shkelje të lirisë dhe të të drejtave. Ndërkohë, trupi gjykues pas mbrojtjes deklaroi se gruaja nuk ishte thjesht me ferexhe, por aq e mbuluar sa nuk identifikohej. Procesi nisi pas një denoncimi të bërë nga kryebashkiaku. Mbrojtja e gruas thotë se nuk tërhiqet dhe do e ndjekë edhe më tej çështjen.
