Ministria e Punëve të Jashtme të Kosovës i është rikthyer synimit të vendosë marrëdhënie “paradiplomatike” me Selinë e Shenjtë, edhe pse një term i tillë nuk është i njohur në diplomacinë ndërkombëtare, shkruan Koha Ditore.
Rregullat kërkojnë që fillimisht të njihet shteti, hapi i dytë është vendosja e marrëdhënieve diplomatike, kurse hapi i tretë dërgimi i ambasadorit. Por Selia e Shenjtë ka kërkuar të veprohet ndryshe për shkak të rrethanave që Kosova ka në raport me Vatikanin.
Burime të gazetës kanë thënë se Ministria e Jashtme tashmë ka propozuar Bukurije Gjonbalajn për shefe të Zyrës së Kosovës për Vatikan, por detyrën ajo do ta ushtrojë nga ndërtesa e Ministrisë së Punëve të Jashtme.
Kjo është bërë për shkak se Vatikani nuk e ka njohur shtetin e Kosovës, parakusht ky për vendosjen e marrëdhënieve diplomatike dhe për shkak se përpjekja e mëhershme që të dërgohet një person në cilësinë e ambasadorit ka dështuar. (b.an)
