Pas Isa Boletinit e kanë rradhën votat. Presidenti Nishani ka vendosur që të gjejë një mënyrë për të hyrë në fushatë në favor të njërës palë dhe kundër palës tjetër, sa më shpesh që të mundet.
Sot ai foli për zgjedhjet dhe votat. U fokusua gjatë dhe me insistim tek blerja e votës. Asgjë e keqe, mund të thotë dikush.
Padyshim që s’ka asnjë të keqe, nëse kjo temë, me ose pa të drejtë, e sforcuar ose jo, e manipuluar ose reale, nuk do të ishte njëkohësisht edhe një debat i nxehtë politik mes opozitës dhe maxhorancës.
Ankohet opozita për blerje votash nga Rama e Meta, del dhe presidenti Nishani e thotë fraza të tipit “Vota nuk merret në këmbim të asnjë favori. Vota vetëm meritohet. Denoncojini përpjekjet për blerjen e votës! Mos u bëni viktima të kësaj dukurie katastrofike, të këtij gabimi fatal, pasojat shkatërrimtare të të cilit vuhen gjatë”.
Kreu i shtetit pranon se shitblerja qenka një dukuri katastrofike, duke bërë shërbimin e rradhës për fushatën elektorale të ish-partisë së tij. Një qëndrim banal dhe aspak konform pozicionit që mban, si unitet i popullit.
