Për gjashtëmujorin e parë të vitit 2015, shitjet e përgjithshme dhe rezultati financiar i ndërmarrjeve paraqesin përkeqësim krahasuar me fundvitin 2014 për të gjithë sektorët. Edhe zgjerimi i veprimtarisë ka pasur sinjale ngadalësimi. Ky shtë konkluzioni i zymtë i një anketimi që ka bërë Banka e Shqipërisë me bizneseti, I publikuar në raportin e stabilitetit financiar të gjashtëmujorit të dytë. Sipas raportit, rëndësia e shitjeve në financimin e veprimtarisë së ndërmarrjeve ka rezultuar në rritje kundrejt mënyrave të tjera të financimit. Shitjet si burim i vetëm financimi përdoren më shumë nga ndërmarrjet e sektorit të industrisë dhe shërbimeve, ndërsa kombinimi i disa burimeve preferohet më shumë nga ndërmarrjet e sektorit të ndërtimit.
Më shumë se gjysma e ndërmarrjeve (51% ose gjithsej 332 ndërmarrje) pohojnë që kanë aktualisht një hua për të paguar dhe kjo peshë ka rënë me 4 pikë përqindjeje krahasuar me gjashtëmujorin e kaluar. Rreth 92% e ndërmarrjeve e kanë siguruar këtë hua vetëm nga bankat, ndërsa pjesa tjetër ka kombinuar njëkohësisht dhe burime të tjera si “huamarrja nga personat fizikë” ose nga “kompani të tjera”. Qëllimet kryesore të huamarrjes mbeten për “shpenzime korrente” (kryesisht sektori i ndërtimit) dhe për “investime afatgjata” (kryesisht sektori i industrisë dhe shërbimeve). Pesha e ndërmarrjeve që e kanë përdorur huanë për shpenzime korrente është rritur si në terma 6-mujorë dhe në terma vjetorë. Kërkesa e ndërmarrjeve për hua paraqitet në rënie, kryesisht në sektorin e ndërtimit dhe shërbimeve. Rreth 42% e ndërmarrjeve deklarojnë se e kanë marrë hua “vetëm në monedhë vendase”, 47% “vetëm në monedhë të huaj” dhe 11% të kombinuar (vendase dhe të huaj). Rreth 20% e ndërmarrjeve pohojnë se duhet ta shlyejnë huanë brenda 12 muajve dhe kjo peshë nuk ka ndryshuar krahasuar me vrojtimin e kaluar. Shumica e ndërmarrjeve (77%) deklarojnë se kanë kolateralizuar kredinë “vetëm me pasuri të paluajtshme” – kjo peshë është rritur disi krahasuar me gjashtëmujorin e kaluar. Për 85% të ndërmarrjeve, vlera e huasë nuk e kapërcen vlerën e kapitalit të firmës. Rreth 93% e ndërmarrjeve shpenzojnë më pak se gjysmën e të ardhurave të tyre për shërbimin e huasë dhe raporti shpenzime huaje/të ardhura ka shfaqur tendencë në rënie. Për gjashtëmujorin e dytë të 2015-ës, ndërmarrjet presin rënie të mëtejshme të pagesës së huasë, sipas BSH.
MONITOR
