Kryeministrja e Britanisë së Madhe, Theresa May, është duke u përballur me thirrje për ta shkarkuar Boris Johnsonin nga posti i ministrit të Jashtëm të Britanisë, pasi Johnson tha se qyteti i Libisë së shkatërruar nga lufta duhet të pastrohet nga trupat e vdekur për t’u bërë destinacion turistik i klasës botërore dhe vend biznesi.
Johnson është akuzuar nga Partia Laburiste se është treguar tejet i pagdhendur, i pashpirt dhe mizor ndaj atyre që kanë vdekur në betejë për ta rimarrë qytetin libian, Sirte, nga Shteti Islamik (ISIS), pasi u pyet gjatë një konference të Partisë Konservatore se si është ta vizitosh Libinë si sekretar i jashtëm, shkruan Guardian.
Duke folur për potencialin e Sirte, qytetin libian ku u vra ish-lideri, Muammar Gaddafi, Johnson shkaktoi të qeshura turpëruese dhe gulçima në audiencë kur tha: “Një grup biznesmenësh britanikë, djem të mrekullueshëm dëshirojnë të investojnë në Sirte, në bregdet, afër vendit ku u kap dhe ekzekutua Gaddafi, siç disa nga ju mund ta dini”.
Më pas shtoi: “Ata vërtet e kanë një vizion të shkëlqyer për ta shndërruar Sirten, me ndihmën e komunës së Sirtes, në Dubain e ardhshëm. E vetmja gjë që duhet ta bëjnë është t’i heqin trupat e vdekur dhe ata do të jenë aty”. /ma.me
