Mbrojtësi i Interit, Miranda është emëruar kapiten i ri i Brazilit pas tërheqjes nga Neymar. Sulmuesi i Barcelonës, Neymar vendosi të mos e mbajë më shiritin pas triumfit me ekipin Olimpik në Rio.
Dhe, selektori i ri, Tite, e konfirmoi Mirandan si kapiten nga ndeshja e ardhshme kualifikuese për “Botërorin 2018” kundër Ekuadorit.
“Brazili ka disa liderë të mirë në ekip dhe jam shumë i lumtur që do ta mbaj shiritin”, deklaroi Miranda gjatë një konference për media në Quito.
“Ne do të luajmë në kërkim të fitores dhe të luajmë futboll të mirë. Tite e ka përgatitur mirë ekipin dhe ne synojmë që atë punë ta kthejmë në zbatim gjatë ndeshjeve.
Ne duhet të jemi mirë të organizuar dhe të përsërisim atë që kemi bërë në ditët e fundit, të jemi të organizuar në mbrojtje dhe të nisemi në kundërsulme të befasishme”, u shpreh Miranda, citohet Zëri. (b.an)
