Asnjë nga degët e Universitetit të Vlorës nuk i ka kaluar 50 % në plotësimin e kuotave të regjistrimit, duke e vendosur institucionin e arsimit të lartë përballë një krize të mungesë së studentëve.
Rektori i universitetit të Vlorës, Roland Zisi, liston si arsyen kryesore pranimet pa kritere mesatareje apo dhe degët e lëna pa kufizim kuotash të Universitetit të Tiranes. Nga kjo braktisje e studenteve vuan më shumë Fakulteti i Ekonomisë, ka sqaruar Zisi.
Zisi: Një prej faktorëve janë kuotat e programeve të studimit të miratuara në kryeqytet. Si vjet, ata kanë shtuar kuotat e pranimit në programet e studimeve. Maturantët kanë pasur hapësira për t’u regjistruar dhe kjo është e bashkëngjitur me dëshirën e maturantëve për të shkuar në metropol.
Ndërkohë numrin më të lartë të kërkesave për regjistrim e ka Fakulteti i Shëndetit Publik. Sipas rektorit Zisi, degët që nxjerrin infermierë apo mami janë te njehsuara me diploma ekuivalente nëpërmjet kartës se Bolonjës, ndaj ciklet studimore të këtij fakulteti kane edhe numrin më të lartë të studentëve.
Zisi: Programet e studimeve që ofron shëndeti publik janë mbushur me studentë. Aty janë regjistruar 99% e studentëve dhe ka mbaruar procesi i regjistrimit.
Aktualisht Universiteti i Vlorës ka përmbyllur fazën e parë të regjistrimeve./oranews
a.ç
