Kreu i Komisionit parlamentar të Sigurisë, Spartak Braho, ka reaguar pas kërcënimit të Shtetit Islamik, i cili, me anë të një videoje të publikuar ka paralajmëruar se do godasë pa mëshirë jo besimtarët në Shqipëri dhe Ballkan. Braho ka deklaruar se militantët e ISIS nuk përbëjnë rrezik për Shqipërinë. Por, Braho ka pohuar se Shqipëria rrezikohet nga Sali Berisha dhe Enkelejd Alibeaj, ku ky i fundit është shkolluar në Iran.
“Të vetmit fanatikë myslimanë në Shqipëri janë dy, pasi i treti ka vdekur para disa kohësh. Dhe këta janë: Sali Berisha dhe Enkelejd Alibeaj, ushtar i Bashkim Gazidedes, i shkolluar në Iran para 20 vitesh”, ka pohuar Braho. Sa i takon videos së publikuar nga përfaqësues të ISIS, Braho u shpreh se janë kërcënime thjesht për të na trembur dhe nuk rrezikojnë sigurinë kombëtare.
“Nuk besoj se kërcënimet e ISIS, përveçse kërcënime me llafe, të jenë kërcënime reale, dhe aq më tepër të jenë rrezik për sigurinë kombëtare. Është e vërtetë se edhe në Shqipëri, si dhe në Kosovë apo Maqedoni, të gjesh aty-këtu ndonjë të indoktrinuar nga fanatizmi islamik ekstrem. Në masën e gjerë kjo filozofi nuk ka simpati, por përbuzje”, u shpreh Braho.
