Braho letër krerëve të Shtetit: Procedoni Ahmetajn, shkeli etikën dhe Ligjin Ushtarak
Kryetari i Komisionit të Sigurisë Kombëtare, Spartak Braho i ka dërguar një letër kreut të Shtetit Bujar Nishani, kryeparlamentarit Ilir Meta si dhe ministres së Mbrojtjes, Mimi Kodheli, për këshilltarin e Presidentit, gjeneral Pirro Ahmetaj.
Këshilltari i Presidentit, Pirro Ahmetaj ka dhënë deklarata të forta dhe fyese kundër anëtarëve të Komisionit të Sigurisë, duke i cilësuar ata si “ish-sigurimsa“.
Sipas Brahos kjo deklaratë është e mbushur me mllef politik, e ndërsa thekson në letrën drejtuar krerëve të Shtetit se është ngjarje e rëndë dhe shkelje e paprecedentë e marrëdhënieve institucionale.
“Eshtë i pakuptueshëm njëkohësisht burimi i këtij “frymëzimi”, motivet të cilat i vlerësojmë se bien në kundërshtim të hapur me funksionet dhe detyrën që ai kryen si këshilltar pranë Presidentit të Republikës. Në këto kushte, krahas vënies në dijeni të këtij akti dhe qëndrimi jo normal të z.Pirro Ahmetaj, ju kërkojmë të thirret nga Presidenti për të sqaruar përmbajtjen e kësaj deklarate, të bëni vlerësimin përkatës duke informuar për sa më sipër Kuvendin e Shqipërisë. Znj. Ministre, duke qënë se prononcimet publike të Ushtarakut Aktiv Gjeneral Brigade Pirro Ahmetaj vijnë në kundërshtim të hapur me kushtetutën dhe me ligjet në Republikën e Shqipërisë, me ligjet që normojnë veprimtarinë dhe drejtimin e Forcave të Armatosura të Republikës së Shqipërisë kërkojmë : Nisjen e procedurave disiplinore për ushtarakun Pirro Ahmetaj me gradë Gjeneral Brigade, me detyrë Këshilltar Ushtarak pranë Presidentit të Republikës së Shqipërisë, vënien përpara përgjegjësisë ligjore si dhe marrjen e masave që parashikon ligji në këto raste”, theksohet në letrën e Spartak Brahos.
Postimim në rrjetin social Facebook i Pirro Ahmetaj
“Konfirmoj se të gjitha ligjet e reformës së mbrojtjes kanë kaluar në Kuvend me nga 72 vota nga 140 dhe shtoj se në asnjë rast në 23 vjet demokraci nuk ka ndodhur kjo qasje sovjetësh (gjithë pushteti Sovjetëve/ fitimtarëve dmth aleancës kriminelëve, sigurimsave dhe qelbësirave). Konfirmoj po ashtu se në këto 72 vota PRO ARROGANCËS (nga 140deputetë) – ka qenë dhe vota e banditëve si Prenga (subjekt i këtij rasti), Frroku, Lutaj, Sterkaj dhe 8 deputetët me rekorde të rënda kriminale dhe disa ish-ushtarakë mediokër deri në perversitet. “ Po ashtu konfirmoj se në Komisionin e Sigurisë Kombëtare – gati gjysma janë ish-oficerë&Kryetarë Dege të Sigurimit dhe Hetuesisë Kriminale të Shtetit (që me diploma falco janë konvertuar “Juridiks” dhe Doktorë Shkencash” … dhe pjesa tjetër mediokër deri për t’u mëshiruar (që vënë syze miopi për t’u dukur intelektualë)… Ky komision, dhe jo vetëm, do të futet në historinë e Parlamentit dhe reformave të mbrojtjes si komisioni i turpit, kriminelëve dhe perversëve”. Siguroj këdo kontribues dhe të shqetësuar se mund të dojë ca kohë por nuk do të vonojë shumë që këto MONSTRA (dhe ata që heshtin), do të përgjigjen për të gjithë këtë histori turpi dhe arrogancë staliniste mbi sistemin e sigurisë dhe qasjen bolshevike me asetet strategjike të mbrojtjes”.
Redaksia Java News/ f.g
