Kampionati Botëror “Rusia 2018” patjetër që do të mbahet mend për numrin e madh të penaltive të akorduara, me mesatare të deritashme prej një penaltie çdo dy ndeshje.Teksa faza e grupeve s’ka përfunduar, rekordet po thyhen. Penaltia e konvertuar në gol nga Salman Al Faraj i Arabisë ndaj Egjiptit ishte e 18-a duke barazuar rekordin për më së shumti penalti në një Kampionat Botëror. Këtë rekord më parë e mbanin Kampionatet Botërore të viteve 1990, 1998 dhe 2002.
Pak orë më pas, Cristiano Ronaldo fitoi penalti ndaj Iranit, duke e çuar në 19 numrin e penaltive. Ai këtë e humbi, pasi topin e priti portieri Ali Beiranvand, transmeton Koha.net.
Pas tij, për Iranin arriti të realizonte Karim Ansarifard në fund për të çuar në 20 rekordin.
Nga këto gjuajtje 15 janë shënuar, ndërsa pesë tjerat janë humbur. Më së shumti penalti të konvertuara në gol u shënuan në Botërorin 98 kur u realizuan 17 gola nga penaltitë, përgatiti Koha. (b.an)
