Pas më shumë se një muaji mungesë, Komiteti Teknik i Ekspertëve do të mblidhet ditën e sotme në orën 14:00, ku pritet të bëhet një analizë e situatës së COVID në vend.
Mbledhja e Komitetit Teknik të Ekspertëve vjen në një kohë kur varianti Omicron i COVID po shqetëson gjithnjë e më shumë ekspertët shëndetësorë në botë, duke u përhapur me shpejtësi në shumë vende. Nuk dihet ende nëse do të ketë shtrëngim të masave kufizuese, për t’u mbrojtur nga varianti Omicron.
Mbledhja e fundit e Komitetit Teknik të Ekspertëve u zhvillua më 22 tetor, ku u vendos vaksinimi me dozë të tretë për personat mbi 60 vjeç, vaksinimi i fëmijëve mbi 16 vjeç dhe i atyre mbi 12 vjeç me sëmundje kronike.
Masat anti-COVID që janë në fuqi:
– Ora policore nga 23:00-06:00.
– Qytetarët të cilët hyjnë në Republikën e Shqipërisë nga të gjitha pikat kufitare duhet të plotësojnë një nga këto tre kushte:
1. Të kenë pasaportën e vaksinimit, ku nga data e vaksinimit të plotë të kenë të paktën dy javë.
2. Të kenë testin PCR negativ brenda 72 orëve ose testin e shpejtë të antigenit brenda 48 orëve.
3. Të kenë provë të kalimit të infeksionit Sars-Cov2, të vlefshme deri në 6 muaj pas shërimit.
Këto rregulla janë të vlefshme edhe për ata qytetarë të cilët kalojnë tranzit në Shqipëri.
Fëmijët deri në 6 vjeç nuk i nënshtrohen këtyre rregullave.
– Qytetarët shqiptarë rezidentë në Shqipëri, të cilët kthehen dhe nuk kanë një nga dokumentat e sipërcituara, duhet të vetëizolohen për 10 ditë dhe të informojnë autoritetin shëndetësor për të kryer një test në fund të periudhës së izolimit.
– Vazhdon të mbetet në fuqi urdhri për përdorimin e maskave në ambientet e mbyllura, në qendra tregtare, supermarket, dyqane, transport publik dhe në të gjitha ato vende ku nuk sigurohet distancimi fizik.
– Nuk lejohet grumbullimi i më shumë se 50 personave
– Vetëm 30% e kapaciteteve për spektatorë në aktivitete sportive e kulturore
/b.h
