Zëdhënësja e Shtëpisë së Bardhë, Karoline Leavitt, deklaroi sot në një konferencë për shtyp se bota është “një vend më i sigurt” pas sulmeve ajrore të ndërmarra nga presidenti Donald Trump ndaj objekteve bërthamore të Iranit.
“Po formohet një konsensus i gjerë që kapacitetet bërthamore të Iranit janë realisht shkatërruar,” tha Leavitt, duke vlerësuar ndërhyrjen si “vendimtare”.
Ajo shtoi se ekipi i Trump ka ndërmjetësuar një “armëpushim historik” në rajon, i cili sipas saj po e udhëheq Lindjen e Mesme drejt paqes dhe larg “kaosit dhe gjakderdhjes”.
“Kjo ishte e paimagjinueshme vetëm një javë më parë. Kjo është fytyra e ‘Paqes përmes Forcës’ nën Presidentin Trump,” përfundoi Leavitt.
