Prej kohësh lajmet për shitjen e Milanit nga Elliott te kompania multimiliardere LVMH, në duart e Bernard Arnault (njeriu i dytë më i pasur në planet, me thuajse 100 miliardë euro) kanë entuziazmuar tifozët kuqezi, që mezi presin për një të ardhme të ndrritur.
Madje, si për të shtuar më shumë kuriozitet vjen edhe deklarata e një prej aksionerëve të klubit francez Lille, i cili thotë se “Elliott te Lille do të vazhdojë të investojë pasi ka fituar shumë para nga plusvlerat e lojtarëve dhe jemi mes 3-4 klubeve më të mëdha për përfitime dhe arkëtime në transferime lojtarësh. Te Milani është kalimthi dhe do ta shesë klubin!”.
Gazeta Repubblica, madje, ka kohë që vazhdon të jetë e bindur se kalimi i pronësisë nga grupi Elliott te ai LVMH i Arnault do të bëhet shumë shpejt. Madje, palët kanë ratifikuar edhe një paraakord dhe janë parë librat e bilanceve. Por, entuziazmi rritet më shumë pasi gazetari ekspert i botës së Milanit, Luca Serafini, ka lëshuar bombën: “Akord Elliott-LVMH për blerjen e Milanit! ratifikimi do të vijë me aprovimin e projektit për stadiumin e ri“.
Madje, Serafini shkon deri aty sa thotë se një zëdhënës i grupit LVMH ka hedhur poshtë gjithçka pasi “jam takuar dhe e kam pyetur. E përgënjeshtroi, por burimet e mia janë serioze dhe të besueshme“.
g.kosovari
