Rreth pesë milionë ukrainas pritet të ikin nga vendi nëse bombardimet nga Rusia në Ukrainë vazhdojnë. Kështu deklaroi shefi i politikës së jashtme Josep Borell.
“Në vetëm një javë ne kemi 1.5 milionë refugjatë. Nëse bombardimet vazhdojnë dhe nëse ata nuk ndalin bombardimet në qytetet ukrainase, do të përballemi me 5 milionë njerëz”.
Borell nënvizoi se Europa duhet të përgatitet për një largim masiv të qytetarëve ukrainas pas sulmit ushtarak rus në Ukrainë.
“Konkretisht, ne duhet të mobilizojmë të gjitha burimet e BE-së për të ndihmuar ato vende që pranojnë refugjatë. Ne duhet të ndihmojmë Poloninë dhe të gjitha ato vende që kufizohen me Ukrainën në mënyrë që të krijohen kushtet e nevojshme për të marrë këta njerëz”.
Duke folur përpara takimit ministror të BE-së, Borrell tha se duhet të ketë një vizion të gjerë politik në mënyrë që i gjithë komuniteti ndërkombëtar të dënojë veprimet e Rusisë. Ai vuri në dukje se prioriteti kryesor duhet të jetë ndihma që u duhet dhënë këtyre refugjatëve.
/a.r
