“Shqipëria ka përparuar në mënyrë të qëndrueshme në mbrojtjen e të drejtave të njeriut”.
Kështu u shpreh kryetari i Prezencës së OSBE-së në Shqipëri, ambasadori Bernd Borchardt gjatë fjalës së mbajtur sot në hapje të një trajnimi treditor për monitorimin dhe raportimin e të drejtave të njeriut, ku ishte i pranishëm edhe Koordinatori Rezident i Kombeve të Bashkuara, Brian J. Williams.
Në takimin e zhvilluar morën pjesë përfaqësues nga tri institucionet kombëtare të të drejtave të njeriut, Avokati i Popullit, Komisioneri për Mbrojtjen nga Diskriminimi dhe Komisioneri për të Drejtën e Informimit dhe Mbrojtjen e të Dhënave Personale si dhe nga institucione qeveritare.
“Shqipëria ka përparuar në mënyrë të qëndrueshme në mbrojtjen e të drejtave të njeriut. Çka është më e rëndësishme, ajo ka ngritur një sistem të plotë ligjor dhe institucional, i cili është në gjendje të përmbushë standardet dhe detyrimet ndërkombëtare për të drejtat e njeriut. Sidoqoftë, ende kemi rrugë për të bërë dhe pjesa më e rëndësishme e kësaj rruge është zbatimi në praktikë i të drejtave të njeriut. Si do ta arrijmë këtë? Monitorimi dhe raportimi janë guri i themelit i zbatimit praktik. Ju të gjithë jepni ndihmën tuaj që Shqipëria të bëhet një demokraci më e drejtë, më gjithëpërfshirëse dhe më e mirë”, tha Borchardt.
