Pesë persona kanë vdekur dhe 36 të tjerë janë plagosur pas një sulmi me një makinë-bombë në një stacion policie në qytetin e Cinarit, në rajonin e Diarbakirit, në juglindje të Turqisë.
Në mesin e viktimave është edhe një nënë me një foshnje, ndërsa autoritetet kanë nxituar të fajësojnë militantët e Partisë së Punëtorëve Kurdë të cilët janë shumë aktivë në këtë zonë.
Shpërthimi shkaktoi dëme të mëdha në ndërtesën e stacionit policor, por edhe te godinat pranë. Makina-bombë shpërtheu në hyrje të stacionit, ndërsa sulmuesit gjuajtën edhe me armë e raketa në drejtim të stacionit.
Rajoni i Dijarbakirit ka qenë arenë përplasjesh të dhunshme mes militantëve të PKK-së dhe ushtrisë turke edhe në të kaluarën. Madje, ky rajon ishte në mesin e atyre zonave që ishin në shtetrrethim vitin e kaluar.
Masa e shtetit turk erdhi pas një bombe që la të vdekur 16 ushtarë dhe një aksioni ku u vranë 16 oficerë policie.
Partia kurde “PKK” rroku armët në vitin 1984 për autonominë e zonave kurde dhe që atëherë, me mijëra njerëz janë vrarë në përleshjet me qeverinë.
