Rusia ka vijuar sulmet ajrore në kryeqytetin ukrainas për të tretën natë radhazi në një seri bombardimesh ku ka zëvendësuar avionët luftarakë me dronë kamikazë.
Shpërthime të fuqishme janë regjistruar deri në orët e para të mëngjesit në zona të ndryshme të Kievit, ku objektiv vijojnë të jenë godinat e civilëve. Deri në këto momente raportohet për një person të vdekur dhe disa të lënduar lehtë.
Ministria e Mbrojtjes në një komunikatë për shtyp bëri me dije se falë sistemit të mbrojtjes ajrore Patriot, u shmang që sulmi të shkaktonte dëme më të mëdha.
Kryetari i bashkisë së Kievit e cilësoi sulmin si një ndër më masivët dhe iu kërkoi qytetarëve që të qëndrojnë në vendstrehime dhe të mos largohen prej aty.
Ndërkohë, një sulm i ngjashëm me dron u regjistrua dhe në Moskë, i cili shkaktoi dëme të vogla materiale. Autoritetet lokale janë ngritur në gatishmëri, teksa është ende e paqartë se nga ka hyrë mjeti fluturues pa pilot.
/a.r
