Lidhur me akuzat pas shkarkimit të ish-ministrit të drejtësisë Ylli Manjani, Gjergj Bojaxhi, anëtar themelues i Sfida për Shqipërinë, thotë se po vërtetohet shprehja se në Shqipëri çudia më e madhe tre ditë zgjat. Pazaret politiko-korruptive po diskutohen tashmë përpara të gjithëve si të ishin normale, thotë ai.
“Nëse do të kishim një shtet të së drejtës, deklaratat akuzuese të ministrit të shkarkuar do të mjaftonin jo vetëm për të rrëzuar këtë qeveri, por për të fshinte një herë e mirë nga jeta politike padrinot e koalicionit politik të turpit,” shprehet Bojaxhi në një deklaratë.
Bojaxhi beson se situata e krijuar ka bërë të qartë se PS dhe LSI janë dy anë të njëjtës monedhë, koalicionit të pazareve që po shkërmoqet nga lufta brenda llojit për plaçkë e privilegje. Ata janë krejtësisht të pashqetësuar nga opozita e dhjamur që përkundet në gjumin e thellë me ëndrra për pushtet, thotë Bojaxhi.
“Padrinot e “Rilindjes”, mund të blejnë heshtjen e disa mediave, përkrahjen e krimit, letargjinë e opozitës, por nuk do t’i bëjnë dot ballë SFIDËS qytetare. Jemi të vendosur të hyjmë në këto zgjedhje jashtë çdo koalicioni me partitë e mëdha, të bindur për një zgjidhje politike jo nga pushtetarët, por nga qytetarët,” shkruan anëtari i kryesisë së Sfida për Shqipërinë.
Bojaxhi e dënon ashpër situatën politike në të cilën ndodhet vendi, ku thotë se partitë vazhdojnë të ndjekin interesat vetjake drejt pasurimit ndërsa populli po shkon drejt varfërisë ekstreme.
“Është e paimagjinueshme që partitë tona të diskutojnë kaq shumë mbi ekonominë, reformat prioritare apo problemet që shqetësojnë vendin. Por ajo që dëgjojmë janë llogaritjet e tyre për interesat vetjake.”
Shkarkimi i ministrit dhe akuzat e tij janë një tjetër këmbanë alarmi dhe këtë herë do të ketë veprim sepse e degjuam fort dhe qartë, përfundon deklarata e Bojaxhi. /a.m.
