Samiti i Diasporës velerësohet si ide nga kryetari i “Sfida për Shqipërinë” Gjergj Bojaxhi, por vetëm kaq. Ai kritikon Ramën pasi sipas tij samiti duhet të kishte qenë më gjithëpërfshirës. Bojaxhi shkon edhe më tej teksa thotë se deklaratat e kryeministrit dëmtojnë jetesën e shqiptarëve në vendt fqinje.
Ja postimi i plotë i Gjergj Bojaxhi:
Samiti i Diasporës ishte një ide e mirë, nëse do të kishte qenë e sinqertë dhe përfshirëse për të gjithë shqiptarët.
Motoja e samitit ishte: “Të pandarë për Shqipërinë”. Po për Kosovën? Po shqiptarët e Malit të Zi e të Maqedonisë? Ky vizion me në qendër vetëm Shqipërinë është i gabuar dhe nuk i respekton shqiptarët. Ky nuk është imazhi i duhur për t’u projektuar.
Shqiptarët meritojnë një shtet serioz, modern e të përgjegjshëm. Një shtet që nuk lëshon deklarata që dëmtojnë jetesën e emigrantëve në vendet fqinje. Dhe që më pas i thërret këta njerëz të marrin pjesë në Samit.
Shqiptarët në diasporë dhe ata në vend kërkojnë respekt. Kërkojnë njohje të punës e kontributit të tyre, si dhe të drejtën për të zgjedhur dhe për t’u zgjedhur me demokraci e transparencë.
Shqiptarët duan të drejtën e pronësisë, duan lehtësira financiare dhe forcimin e urave të bashkëpunimit me shtetet ku ata jetojnë. Kjo është sfida që ata kanë ndaj klasës politike. Ky do të ishte trajtim dinjitoz i diasporës dhe i gjithë shqiptarëve. Dhe kjo është e mundur, pa këtë klasë politike.
/a.m.
