Deputeti demokrat, Gerti Bogdani, ka reaguar sot përmes një dalje publike para mediave duke theksuar se revolta e qytetarëve shqiptarë do ta ndëshkojnë koalicionin e majtë më 23 qershor.
“Çdo qytetar i Tiranës dhe i Shqipërisë e ka shumë të qartë dhe e di fare mirë se Lulzim Basha si kryetar bashkie i ka dhënë Tiranës pamjen dhe vizionin e një qyteti modern dhe europian. Me projekte për bulevardin e ri, me projekte për terminalin multimodal të pasagjerëve, për një transport publik modern, të gjitha këto projekte të bllokuara dhe të ndaluara nga Edi Rama në Këshillin Bashkiak të Tiranës” – tha Bogdani, i cili më parë ka mbajtur edhe postin e kryetarit të një prej njësive bashkiake të kryeqytetit.
Duke u ndalur në punën e Edi Ramës si ish-kryetar bashkie, sipas deputetit demokrat, e vetmja gjurmë që Rama la është betoni.
“Sot, Rama fshihet, nuk përballet me qytetarët e tij dhe prezantimet e kandidatëve i bën ose duke ikur me vrap siç bëri në Tiranë, ose në salla të mbyllura dhe të errëta” – përfundoi Gerti Bogdani.
