Guximtar Boçi, ish-kryetari i Gjykatës së Gjirokastrës, i dyshuar si i përfshirë në një skandal seksual, rrëfeu dje versionin e tij të ngjarjes në Prokurorinë për Krimet e Rënda. Për gati 90 minuta, gjyqtari Boçi, aktualisht i pezulluar nga Këshilli i Lartë i Drejtë- sisë, dha shpjegime para prokurorëve që po e hetojnë për “korrupsion pasiv”.
Hetimi ndaj Boçit nisi pas publikimit të një audio-përgjimi në programin “Stop”, ku dëgjohet duke biseduar me një qytetare, të cilës i kërkon favore seksuale në këmbim të ndihmës në një çështje gjyqë- sore. Burime pranë Prokurorisë për Krimet e Rënda bënë me dije se gjatë seancës së marrjes në pyetje, Boçi ka mbajtur qëndrim mohues ndaj akuzës. Ai ka hedhur poshtë çdo pretendim të ngritur nga denoncuesja e tij, Rudina I.
Ish-kryegjyqtari i Gjirokastrës e ka konsideruar denoncimin ndaj tij si një sajesë dhe sulm që i bëhet për shkak të detyrës së tij funksionale të gjyqtarit.
“E gjithë kjo ngjarje është e sajuar. Unë nuk i kam kërkuar favore seksuale askujt dhe nuk kam ndikuar në dhënien e asnjë vendimi gjyqësor. Çdo gjë që është bërë publike, është manipulim për të më dëmtuar mua”, mësohet të jetë shprehur Boçi.
Gjyqtari i dyshuar ka pretenduar se audio-përgjimi i publikuar në media është i manipuluar dhe i pavërtetë. Sipas burimeve, ish-kryetari i gjykatës u ka dorëzuar prokurorëve disa vendime të Gjykatës së Gjirokastrës për pushimin e një sërë padish, që kishin si palë paditëse 38-vjeçaren Rudina I., e njëjta që e denoncoi atë për kërkesa me natyrë seksuale.
Gjyqtari që po hetohet në gjendje të lirë ka shprehur gatishmëri për t’u ballafaquar me denoncuesen e tij dhe po ashtu edhe me gjyqtaren e Gjirokastrës, Blerta Çibuku. Gjatë pyetjes në Prokurori për llogari të të njëjtit hetim, kjo e fundit pranoi se ish-kryetari i kishte kërkuar të shikonte me përparësi padinë e 38- vjeçares.
SHKARKIMI
Guximtar Boçi u shkarkua nga detyra e kryetarit të Gjirokastrës gjatë një mbledhjeje të jashtëzakonshme të KLD-së, të mbajtur më 28 tetor. Në të njëjtën mbledhje, anëtarët e Këshillit vendosën edhe pezullimin e tij nga ushtrimi i detyrës së gjyqtarit deri në marrjen e vendimit gjyqësor të formës së prerë për çështjen penale të ngritur në ngarkim të tij.
Audio-përgjimi që bëri objekt të një procedimi penal gjyqtarin Boçi mendohet të jetë realizuar në vitin 2015, kohë kur Gjykata e Gjirokastrës po shqyrtonte një padi pronësie, në të cilën ishte palë edhe Rudina I. Sipas thënieve të 38- vjeçares në Prokurori, gjyqtari Boçi i kërkoi favore seksuale në këmbim të ndikimit te gjyqtarja Çibuku, gjyqtare e çështjes për një vendim në të mirë të saj.
ma.me
