Menjëherë pas deklarimit të kandidaturës për zgjedhjet lokale në Bashkinë Dibër, mjeku kirurg Muharem Rama është vënë në qendër të sulmeve të Partisë Demokratike dhe mediave pranë saj. Një ditë më parë, fillimisht në media e më pas përmes një statusi në rrjetin social Facebook duke ju referuar ‘qytetarit dixhital’, ish-Kryeministri Sali Berisha akuzoi kandidatin socialist se nuk ka plotësuar formularin e vetdeklarimit në funksion të ligjit për dekriminalizimin.
Por, ndryshe nga sa pretendohet, në faqen zyrtare të Komisionit Qendror të Zgjedhjeve ndodhet i publikuar formulari i vetdeklarimit të Muharem Ramës në cilësinë e anëtarit të Këshillit Bashkiak. Formulari është i depozituar në Komisionin Qendror të Zgjedhjeve, protokolluar dhe verifikuar në zbatim të ligjeve përkatëse nga ky institucion.
Bazuar mbi pretendimin e mosplotësimit të formularit, ish-Kryeministri Berisha shkoi dje më tej kur akuzoi kandidatin e mazhorancës për Bashkinë Dibër si person me precedent penalë dhe problem me drejtësinë në Zvicër. Kandidati Rama ju përgjigj këtyre pretendimeve duke deklaruar se “kurrë në jetën time nuk kam qenë në Zvicër. Kurrë nuk kam lëvizur me pasaportë fallco. Në 20 vjet pune nuk e kam braktisur kurrë Dibrën. Kjo mund të verifikohet lehtësisht. Mund të shihen borderotë ku jam paguar. Unë këtë sqarim po e bëj për hir të qytetarëve. Nuk prisja fjalë të mira nga doktori i sëmurë i Tiranës”./a.m.
