Deputeti i mazhorancës në Kuvendin e Shqipërisë Eduart Ndocaj ka pritur gjatë në aeroportin në Malpensa në Itali, ku do të fluturonte drejt Shqipërisë.
Prej mëngjesit kur ishte parashikuar udhëtimi dhe deri në orën 17:00 të pasdites, Ndocaj thotë përmes një statusi në Facebook, se kanë mbetur në pritje qindra pasagjerë të tjerë në aeroport.
Sipas tij, askush nuk i ka sqaruar deri më tani për arsyen e mos nisjes së avionit, por Ndocaj mendon se shkak mund të jetë bërë dëbora që ka bllokuar aeroportin ndërkombëtar “Nënë Tereza” në Rinas.
Në postimin e tij, Ndocaj thotë se “Nënë Terezën” e administrojnë gjërmat… Me siguri e ka fjalën për gjermanët, por që gabime të tilla janë të zakonshme në shkrimet e “Kaubojsit të Lezhës”.
“Aeroportin e Rinasit e administrojnë gjërmat. Në shumicën e qyteteve të Gjermanisë bie shumë borë e aeroportet nuk bllokohen kurrë se pastrimi i pistave është efikas. Ndërsa Shqipëria ka vetëm një aeroport internacional dhe me 5 cm borë ai është në black out. Turp!”, shkruan deputeti në Facebook. /java/b.d
