Partia Demokratike ka vendosur që të vijojë qëndrimin e saj të kushtëzuar ndaj Parlamentit, teksa deri më tani, dy prej kërkesave të saj janë rrëzuar në komisionet parlamentare. Bëhet fjalë për një shtesë në ligjin për dekriminalizimin dhe kërkesën e PD-së për komisionet hetimore.
Në mbledhjen e djeshme të grupit parlamentar demokrat, burime të Javanews në selisë blu, bëjnë të ditur se vendimi për të mbajtur një qëndrim të kufizuar ndaj parlamentit është ende në lojë.
PD vijon të kushtëzojë dialogun për reformën në drejtësi duke vënë përpara procesit kushtet e saj e sidomos ato të dërgimit në Gjykatën Kushtetuese të mandateve të dy deputetëve socialistë Rakip Suli dhe Valentina Leskaj.
Nga ana tjetër, në rendin e ditës së seancës plenare nuk parashikohet asnjë pikë për diskutimin e mandateve të deputetëve të PS-së. Gjithashtu nuk pritet që maxhoranca të çojë në kushtetuese mandatet e deputetëve
Sakaq, prej disa ditësh, ambasadori i SHBA-ve Donald Lu ka nisur një tur takimesh për të arritur konsensusin e munguar në dialogun për reformën në drejtësi, proces i cili ka ngecur me largimin e opozitës nga tavolina.
Pritet që këtë të enjte, një temë debati e nxehtë në parlament të jetë dhe kërkesa e PD-së për të nisur një komision hetimor për aferën Cez, duke argumentuar se përmes saj Kryeministri Rama ka grabitur të paktën 500 milionë euro nga shqiptarët.
Por përtej kësaj kërkese të re dhe “kushteve” të vjetra, PD do të mbajë tashmë një qëndrim të njohur në parlament.
