Forca të shumta policore të Kosovës kanë nisur aksionin për arrestimin e personave që dyshohet se merren me kontrabandë në Zubin Potok dhe në pjesë të tjera të Veriut të Kosovës.
Mediat kosovare bëjnë me dije se policia ka pasur edhe rezistencë të armatosur në veri, ku për pasojë kanë mbetur të plagosur dy policë.
Nga raportimet e para, në pranga kanë rënë pesë persona, mes tyre edhe zyrtarë të policisë.
Të arrestuarit akuzohen për veprat penale “Pjesëmarrje ose Organizim i Grupit Kriminal”, në lidhje me veprat tjera penale si; “Kontrabandim me Mallra”, “Keqpërdorim i Pozitës Zyrtare”, “Dhënie e Ryshfetit”, “Tregti e Ndaluar” etj.
Operacioni po zhvillohet nga Policia e Kosovës (PK), në bashkëpunim me Inspektoratin Policor të Kosovës (IPK), si dhe nën asistimin e njësiteve tjera relevante në zbatim të urdhëresës së Gjykatës Themelore Prishtinë.
Gjatë aksionit në veri policia ka arrestuar edhe komandantin i Policisë së Kosovës në Zubin Potok, i cili është i shtetas serb.
Por rreth 100 banorë serbë janë mbledhur duke bllokuar rrugën drejt Mitrovicës. Te shtëna të vazhdueshme të armëve të zjarrit po dëgjohen në Zubin Potok dhe rrethinë.
Krisma janë dëgjuar edhe në fshatrat Varage dhe Zupc ku janë mbledhur qytetarët.
Mësohet se policia ka arritur të thyej barrikadën dhe të vazhdojë në drejtim të Mitrovicës së bashku me të arrestuarit.
Policia e Kosovës ka sqaruar se operacioni policor i sotëm në veri nuk ka të bëjë me rastin e vrasjes së Heroit Enver Zymeri dhe ish politikanit Oliver Ivanoviç, siç potencohet në disa media serbe dhe lokale.
“Ashtu siç e kemi potencuar edhe në komunikatën e poshtëshënuar, këtij operacioni policor i ka paraprirë një hetim disamujor i IPK-së dhe PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtarëve policorë dhe të disa qytetarëve në veprimtari kriminale ‘pjesëmarrje ose organizim i grupit kriminal’ dhe vepra tjera të specifikuara”, thotë policia.
Ky operacion policor është ende në vazhdim e sipër, si pasojë e rezistencës në Veri të Mitrovicës një zyrtar policor është plagosur por është jashtë rrezikut për jetë, përderisa deri më tani janë arrestuar disa zyrtarë policorë, disa qytetarë si dhe janë konfiskuar gjësende të ndryshme përfshirë edhe disa armë.
g.kosovari
