Blerjet online janë shndërruar në një ndër trendet e preferuara të shqiptarëve. Arsyeja përsë ata bëjnë porosi online janë çmimet e ulëta e produkteve të porositura, krahasuar kjo me vlerën që ato kanë në tregun shqiptar.
Numri i lartë i porosive të bëra online i shtyn qytetarët që të presin disa orë për marrjen e shërbimit në Postën Shqiptare, gjë që për ta nuk përbën problem pasi çmimi rreth 90% më pak për produktet e porositura e justifikon këtë.
Por këto janë ditët e fundit që qytetarët presin në rradhë në Postën Shqiptare për marrjen e porosive të bëra online, pasi në fillim të muajit maj nis hapja e zyrave të reja.
“Ka pasur një rritje rreth 35% krahasuar me 2014, ka një fluks shumë të madh të objekteve që vinë nga jashtë me porosi për shkak të blerjeve që bëjnë individë të caktuar. Në vlerë absolute ishin rreth 1.9 milion objekte të cilat kanë hyrë gjatë vitit 2015 nga vende të ndryshme” = thotë për OraNews, drejtori i Postës Majlind Lazimi.
Sipas tij, aktualisht posta ka një zyrë funksionale sa i përket kolipostës.
“Besoj brenda një periudhe kohore dhjetë ditore deri në dy javë po pregatitemi të hapim nëj zyrë të re, e cila në një farë mënyre do të adresonte këtë ritëm të fluksit që është përtej parashikimeve tona” – shton ai
Numri i websiteve të cilat ofrojnë shërbimin e porosive online është rritur ndjeshëm, porosi të cilat mund të bëhen në shtete të ndryshme të botës.
