Në një deklaratë për media gjatë ditës së sotme, deputetja e Partisë Demokratike Eleina Qirici u shpreh se Ministria e Shëndetësisë ka blerë autoambulancat pa zhvilluar tender. Sipas deputetes, kompania fituese ka qenë e paracaktuar dhe ka përftuar pothuajse të gjithë fondin limit të vendosur në dispozicion. Por i menjëhershëm ka qenë reagimi i qeverisë, e cila përmes portalit transparenca.al thekson se investimi i fundit në sektorin e transportit në shërbimin shëndetësor, të cilin përmend deputetja Eleina Qirici, i përket vitit 2014 kur u blenë 20 autoambulanca për shërbimin shëndetësor dhe iu shpërndanë 20 spitaleve në mbarë vendin.
Qeveria deklaron se fondi prej 150 milionë lekë për blerjen e këtyre 20 autoambulancave, u bë i mundur me Aktin Normativ nr. 1, datë 17 shtator 2014.
“Falë kësaj procedure, janë pajisur për herë të parë me autoambulancë, pas 12 vjetësh, spitalet rajonale të Shkodrës dhe Gjirokastrës, spitalet e Bulqizës, Kolonjës, Malësisë së Madhe, Tropojës, Kuçovës, Pukës, Krujës, Skraparit, Librazhdit, Përmetit, qendra shëndetësore e Himarës dhe Klinika Qeveritare Tiranë” – thekson qeveria në reagimin e saj.
Transparenca.al shkruan se ndryshe nga pretendimi i opozitës se fondi i është akorduar një kompanie të paracaktuar, pra pa zhvilluar tender, procedura e prokurimit ka qenë elektronike dhe e hapur prej datës 23 tetor 2014. Në këtë garë kanë marrë pjesë pesë operatorë ekonomik, nga të cilët tre prej tyre nuk dorëzuan ofertë. Në përfundim të procesit të hapur elektronik, më datë 19 nëntor 2014 fitues u shpall operatori ekonomik “Classic”, me vlerë 149,640,000 lekë (me TVSH).
“Specifikimet teknike të procedurës së prokurimit ishin të njëjta me ato që u hartuan nga japonezët për procedurën e zhvilluar për blerjen e autoambulancave të Grantit Japonez në Dhjetor 2009 – JICA – nga Ministria e Shëndetësisë në nëntor 2014.
Gjithashtu vlen të theksohet se kompania fituese zotëron eksperiencë në këtë fushe, pasi në vitin 2009 është përzgjedhur nga qeveria e kaluar për të sjellë në Shqipëri 18 autoambulanca” – theksohet në reagim.
