Blerim Çela, themelues dhe ish-deputet i Partisë Demokratike, flet pa dorashka për shanset e opozitës në zgjedhjet e ardhshme. Sipas Çelës, PD nuk vjen në pushtet për sa kohë që të ndikohet nga Sali Berisha. Deklarata e Çelës u bë në sionin “Ditë e Re” në Ora News, ku ishte ftuar me rastin e ribotimit të librit “Deformimi i Partisë Demokratike” .
“Për sa kohë që Berisha do të ketë influencë në Partinë Demokratike, PD nuk do të vijë në pushtet. Berisha është opozita e gjallë e PD-së sot për sot, por nuk i shërben me atë mënyrë të të foluri, pasi është bërë i mërzitshëm. Nuk ka pse futesh në familjet e deputetëve. Nëse ka akuza për korrupsion, çoji në prokurori, nëse prokuroria nuk e bën, të kërkojë shkarkimin, e ka tagrin, por nuk mund të merret me familjet e deputetëve. Opozita duhet bërë, por me zotnillëk”, thotë Çela.
Ai jep edhe arsyen e tij se pse Kuvendi është në gjendjen aktuale:
“Parlamenti i vitit 1992-1996 ishte parlamenti më i shkolluar, nga të dy kahet e politikës, ishin njerëz intelektualë, por kjo mori fund me ndryshimet kushtetuese të firmosura nga Rama e Berisha, ku listat e deputetëve i bënin kryetarët. Listat i kanë bërë ashtu siç u leverdiste atyre dhe jo sipas mundësive dhe meritave që kishte secili prej nesh për t’u përballur me kundërshtarin në zgjedhje.
Sot primadona e parlamentit është Berisha. Për dy arsye. E para, është se ai ka shumë informacion, artikulon mirë dhe i thotë gjërat me guxim, pavarësisht se kam kontestimet e mia si flet. E dyta, më duket se është lojë e Ramës dhe e Metës. Meta për t’i thënë Berishës që unë të lë të flasësh, ndërsa Rama i thotë Metës lëre të flasë që ai të diskretitohet përmes fjalëve të tij”.
Blerim Çela jep opinionin edhe për Partinë Socialiste.
“E majta u reformua dhe u bë parti demokrate me katarsisin e Nanos, Rama po e mbyll si Sali Berisha”.
Ndërkaq, në librin e tij “Deformimi i Partisë Demokratike”, Çela tregon historinë që nga themelimi, mocioni i mosbesimit deri sot.
Mes dilemave nëse botimi librit indirekt do të ndihmonte PS-së, ka fituar qëllimi: “T’i shërbejë demokratëve duke treguar si duhet të jetë PD që njëshi të mos ketë mundësi të jetë gjithmonë në krye dhe të jetë ai i vetmi vendimarrës”.
Duke u rikthyer tek ish-kryetari, Blerim Çela tha: “E kam dashur shumë Berishën, jo vetëm unë por të gjithë demokratët që e kishin afër, prandaj jam zhgënjyer shumë”.
Në libër shkruan: “Ai qe më i zoti se ne. Me dinakëri na mbajti afër. Na mashtroi me frazeologji antikomuniste, fuqizoi pushtetin përmes nesh dhe na largoi pjesë-pjesë”.
