Mbrojtja e prodhimit vendas në sektorin e blegtorisë është ndër prioritetet e politikave të qeverisë. Zv.ministri i Bujqësisë dhe Zhvillimit Rural Dhimitër Kote, në një intervistë për ATA tha se Qeveria ka vënë taksë për qumështin që vjen nga jashtë, me qëllim mbrojtjen e prodhimit e vendas në këtë sektor.
Megjithatë thekson ai, qeveria është në diskutim edhe me grupet e interesit dhe ekspertët e fushës, që vitin që vjen të hartojë një strategji të qartë dhe transparente, duke gjetur koston, që blegtoria të jetë sa më fitimprurëse.
“Blegtoria është sektori më i vështirë dhe ne jemi duke parë koston reale të tij, në këndvështrimin edhe të bashkimit të fermave blegtorale, pasi kostot ulen kur tufat e krerëve janë më të mëdha, ulet kosto nga teknologjia për mbarështrimin dhe përpunimin, kjo pasi në treg nuk jemi vetëm me prodhim vendas, por janë edhe prodhimet nga rajoni. Prandaj duhet të futemi në këtë garë me koncepte të qarta të konkurrueshmërisë dhe standardeve më të mira”- u shpreh Kote.
Sipas tij, politikat dhe zhvillimi do t’i përgjigjen konkurrencës së tregut dhe qeveria krijon lehtësi për nxitjen e investimeve. Kote tha se, subvencionimi i fermerëve për qumështin që shesin, është mbështetje që e jep qeveria dhe e merr vetëm fermeri dhe nuk do ta marrë më pika e grumbullimit apo përpunimit. Kjo do të thotë që fermeri të ndjejë realisht këtë mbështetje.
“Subvencionimi është zgjidhja që u vjen në ndihmë të gjithë fermerëve që merren me prodhimin e qumështit, tha zv.ministri i Bujqësisë Kote. ATA
/a.meta
