Të tjera detaje zbulohen për ngjarjen e ndodhur paraditen e sotme në Pogradec, ku u vendos eksploziv në një varkë peshku në Volorek. “BalkanWeb” mëson se pronari i varkës, i cili ka edhe një vaskë peshku është Renato Kadilli 33 vjec, emër i njohur për policinë e Korçës.
Dy muaj me parë dyshohet se ky shtetas ka qëlluar me armë drejt dy personave në fshatin Zagorcan të Pogradecit. Burime konfidenciale thonë për “BalkanWeb” se hetimet për ngjarjen e sotme po behën ne dy pista, asaj të pronësisë dhe të konfliktit personal.
Si pasojë e shpërthimit nuk është dëmtuar vetëm varka, por edhe automjeti tip Benz me targë “AA 060 RJ” i shtetasit Renato Kadilli që ka në pronësi vaska peshku. Sipas ekspertëve shpërthimi ka qenë i fuqishëm dhe dyshohet se sasia e eksplozivit ka qenë e konsiderueshme.
