Janë plot 130 procedura, me të cilat biznesi përballej në të shkuarën në mënyrë të përditshme, por që tashmë janë dixhitalizuar apo janë në proces dixhitalizimi.
Kjo e dhënë i përket vetëm procedurave të kthyera “online” gjatë vitit 2017-të. Në total, kjo paketë e re lehtësuese për biznesin i bashkohet më shumë se një mijë shërbimeve, që aktualisht ofrohen në portalin e shërbimeve qeveritare, “E-Albania”.
Sipas përllogaritjeve zyrtare, vetëm nga procedurat e dixhitalizuara këtë vit nga Ministria e Financave, biznesit i kursehen në një vit, plot 56 vite jetë.
E thënë ndryshe, të gjitha bizneset e marra së bashku, shpenzonin deri më tani 56 vite jetë, brenda një viti të vetëm, për të plotësuar dokumentet që tashmë mund t’i përpilojnë të gjitha online.
Kjo e dhënë u bë publike gjatë punimeve të forumit ndërkombëtar të biznesit, “Tirana Business Matching”, një event që solli në Tiranë plot 150 kompani të huaja, të interesuara për të gjetur një partner vendas për të investuar në ekonominë shqiptare.
Përveç kompanive të ardhura nga vendet e rajonit dhe Italia, të pranishëm në këtë forum ishin edhe kompani kineze, amerikane, turke, spanjolle, nga Emiratet e Bashkuara Arabe, etj.
Një platformë e tillë bashkëpunimi pritet që të ndikojë në rritjen e mëtejshme të investimeve direkte në Shqipëri, që në vitin 2016 shënuan një rekord historik me vlerën e 983 milionë eurove, një rritje prej 100 milionë eurosh krahasuar me vitin 2015 ose pothuajse 50% më shumë krahasuar me pesë vite më parë.
Për 2017-n, parashikohet që për herë të parë në histori, investimet e huaja direkte të tejkalojnë nivelin e një miliardë eurove. /b.d
