Bizneset me xhiro vjetore 5-8 mln lekë do parapaguajnë këstet çdo tre muaj brenda datave 20 prill, 20 korrik, 20 tetor, 20 dhjetor…
Me hyrjen në fuqi të Paketës Fiskale 2016, ndryshon edhe niveli dhe mënyra se si, biznesi i vogël që ka një xhiro deri në 8 milionë lekë do të paguajë taksat gjatë periudhës në vijim.
Që nga janari i këtij viti shkalla tatimore e aplikueshme mbi fitimin e tatueshëm, për tatimpaguesit që i nënshtrohen tatimit të thjeshtuar mbi fitimin e biznesit të vogël, me qarkullim vjetor nga 5 (pesë) deri në 8 (tetë) milionë lekë, është 5 për qind.
Ndërsa tatimi i thjeshtuar mbi fitimin, për tatimpaguesit me qarkullim vjetor nga 0 (zero) deri në 5 (pesë) milionë lekë, është 0 (zero) lekë në vit.
Në ndryshimet e reja ligjore këstet e parapagimit të tatimit të thjeshtuar mbi fitimin, për vitin vijues, për tatimpaguesit me qarkullim vjetor nga 5 (pesë) deri në 8 (tetë) milionë lekë, llogariten në bazë të të dhënave të deklaratës tatimore të një viti më parë.
Forma dhe përmbajtja e deklaratës tatimore vjetore përcaktohen me udhëzim të Ministrit të Financave. Gjatë periudhës vijuese tatimore, tatimpaguesi parapaguan, në llogarinë e organeve tatimore ose në Postën Shqiptare, këstet tremujore të tatimit të thjeshtuar mbi fitimin, të biznesit të vogël, brenda datës 20 prill, për muajt: janar, shkurt e mars; brenda datës 20 korrik, për muajt: prill, maj e qershor; brenda datës 20 tetor, për muajt: korrik, gusht e shtator; dhe brenda datës 20 dhjetor, për muajt: tetor, nëntor dhe dhjetor.
Si ishte
Më parë, shkalla tatimore e aplikueshme mbi fitimin e tatueshëm për tatimpaguesit që i nënshtrohen tatimit të thjeshtuar mbi fitimin e biznesit të vogël, me qarkullim vjetor nga 2 (dy) deri në 8 (tetë) milionë lekë, ishte 7,5 (shtatë presje pesë) për qind, por jo më pak se 25 000 (njëzet e pesë mijë) lekë në vit.
Tatimi i thjeshtuar mbi fitimin për tatimpaguesit me qarkullim vjetor nga 0 (zero) deri në 2 (dy) milionë lekë ishte 25 000 (njëzet e pesë mijë) lekë në vit.
Këstet e parapagimit të tatimit të thjeshtuar mbi fitimin për vitin vijues, për tatimpaguesit me qarkullim vjetor nga 2 (dy) deri në 8 (tetë) milionë lekë, llogariteshin në bazë të të dhënave të deklaratës tatimore të një viti më parë. Forma dhe përmbajtja e deklaratës tatimore vjetore përcaktohen me udhëzim të Ministrit të Financave. Gjatë periudhës vijuese tatimore, tatimpaguesi parapaguan, në llogarinë e organeve tatimore ose Postës Shqiptare, këstet tremujore të tatimit të thjeshtuar mbi fitimin të biznesit të vogël, brenda datës 20 prill, për muajt janar, shkurt dhe mars; brenda datës 20 korrik, për muajt prill, maj dhe qershor; brenda datës 20 tetor, për muajt korrik, gusht dhe shtator dhe brenda datës 20 dhjetor, për muajt tetor, nëntor dhe dhjetor. Tatimpaguesit me qarkullim vjetor nga 0 (zero) deri në 2 (dy) milionë lekë në vit paguajnë si tatim të thjeshtuar mbi fitimin një tatim fiks, në masën 25 000 (njëzet e pesë mijë) lekë në vit. Kjo pagesë kryhet brenda gjashtëmujorit të parë të çdo viti. Tatimpaguesit
me qarkullim nga 0 (zero) deri në 2 (dy) milionë lekë në vit, të cilët fillojnë ushtrimin e aktivitetit gjatë gjashtëmujorit të dytë të vitit, paguajnë detyrimin e tyre tatimor proporcional brenda datës 20 dhjetor të vitit vijues.
Tatimpaguesit me qarkullim nga 0 deri në 2 milionë lekë në vit paguanin tatimin fiks, në masën 25 000 lekë në vit, te drejtoritë rajonale tatimore brenda gjashtëmujorit të parë të çdo viti, te bankat e nivelit të dytë dhe Postës Shqiptare, për llogari të drejtorisë rajonale tatimore.
Monitor
