Një i vdekur, 2 në rrezik për jetën, 20 të plagosur dhe mbi 4 milionë euro dëm ekonomik është bilanci i 13 shpërthime të bombolave të gazit përgjatë 7 muajve të parë të vitit 2017. Rasti më i fundit i përket zjarri të një ditë më parë ku në Velipojë një resort turistik u përfshi nga flakët dhe shkak ishte bombola e gazit, ndërsa këto ngjarje nuk kanë munguar as në banesa private, pallate, biznese dhe pika shërbimi.
Ekspertizat e hetimeve të prokurorisë kanë nxjerr se dëmi ekonomik përfshin dëmtimet në banesa, biznese, si dhe koston mjekësore të paguar nga shteti për të lënduarit në këtë periudhë dhe në të gjitha rastet ka rezultuar se bombolat ose kanë qenë jashtë parametrave teknik o janë vendosur në shkelje ligjore. Sipas legjislacionit në fuqi bombolat metalike duhet të hiqen nga qarkullimi dhe të zëvendësohen me ato plastike por situate në terren është alarmante ku nuk kanë munguar dhe pasojat.
Vitit 2017 do të niste me një shpërthim në Bilisht në qendrën shëndetësore të këtij qyteti ku bombola përdorej për ngrohje dhe të plagosura mbetën dy infermiere në ngjarjen e ndodhur më 12 Janar. Një javë më pas shpërthimi nga bombola do të transferohej në Bulqizë ku të plagosur nga flakët me djegie e fraktura mbetën disa persona më 19 janar në Cekren të Bulqizës ku flakët përfshijnë banesën e kryeplakut.
Më 15 shkurt 2017 në qytetin e Vlorës, flakët e shkaktuara nga përdorimi i gazit përfshijnë një lokal në lagjen partizani dhe të lënduar në gjendje të rëndë mbetën dy persona. Po në ambientet e një subjekti tregtarë këtë herë në periferi të Tiranës, në Vaqarr më 25 shkurt shpërthimi i bombolës la 3 persona.
Në muajin Mars shpërthimi i bombolës së gazit do të shënohej në Shkodër, ku në lagjen “Nezmi Kryeziu” flakët shkrumbuan kati e dytë të një banese duke u lënduar 2 persona dhe duke shkaktuar viktimën e parë për këtë vit 74 vjeçarin Haki Hoxha.
19 Prill 2017, shpërthimi i bombolës që përdorej për gatim la të lënduar 62 vjecaren në Elbasan duke i djegur asaj shtëpinë dhe duke rrezikuar fqinjët.
15 Maj 2017, në lagjen numër 4 në Korçë shpërthimi i bombolës plagosi 63 vjeçarin me iniciale E.P
1 Qershor 2017, flakët e shkaktuara nga bombola përfshijnë banesat sociale në Tiranë ku një e moshuar shpëtoi fatmirësisht duke u ndihmuar dhe nga fqinjët.
Mbrëmjen e 2 qershorit 2017 nga i njëjti shkak flakët e shpërthimit të bombolës së gazit përfshijnë banesën e dy të moshuarve në Durrës në lagjen 15. Banorët e pallatit numër 52 në rrugën “Muhamet Gjollesha” më 8 korrik 2017 u zgjuan të tmerruar.
Pallati i tyre u trondit por jo nga tërmeti apo një lëndë eksplozive, këtë herë ishte shpërthimi i bombolave në byrektoren që shërben në katin e parë që shkaktoi tmerrin dhe dëmtimet si të kolonave të pallatit ashtu dhe të orendive të tyre shtëpiake.
Flakët në resortin e Velipojës
Pa kaluar pak ditë nga kjo ngjarje që pamjet e shkatërrimit janë të denja për balance lufte, flakët e shkaktuara nga bombolat e gazit u transferuan në resortin turistik Fishta në Velipojë. Në këtë ngjarje bilanci mund të ishte dhe më tragjik, por djegia e 1000 litrave gaz shkaktoi 4 të lënduar, mes tyre dy ende në gjendje të rëndë.
Pasditja e 28 korrikut do të shënonte shpërthimin e dytë, këtë herë në Roskovec të Fierit ku bombola e gazit shkrumboi tërësisht një banesë por fatmirësisht pa viktima. Pak orë më pas, flakët nga bombola përfshinë katin e tretë të një banesë në Lushnje në lagjen “Kongresi”, ku fatmirësisht ndërhyrja në kohë e zjarrfikësve shmangu tragjedinë duke shpëtuar personat e një familje.
