Në bilancin e saj të javës në luftën kundër kriminalitetit dhe paligjshmërisë, Policia e Shtetit njofton se ka prangosur 18 persona për vjedhje energjie, ndërtime pa leje dhe prerje të pyjeve.
Janë evidentuar pas 2765 kontrolleve në terren, 43 raste të vjedhjes së energjosë elektrike, me 43 autorë të ndryshëm. Nga këta, 12 autorë janë arrestuar në flagrancë, 4 autorë janë shpallur në kërkim dhe 27 autorë ndiqen në gjendje të lirë.
Në lidhje me prerjen a paligjshme të pyjeve në të gjithë vendin vijon operacioni “Roja i Gjelbër”, ku gjatë javës që kaloi në të gjithë vendin janë evidentuar 9 raste me 9 autorë, nga të cilët 2 janë arrestuar në flagrancë, 6 ndiqen në gjendje të lirë dhe 1 është shpallur në kërkim.
Në fushën e ndërtimeve të paligjshme, nga ana e Strukturave të Policisë së Shtetit në të gjithë vendin janë evidentuar 28 raste të ndërtimeve pa leje.
Për këto raste janë evidentuar dhe proceduar 28 autorë nga të cilët, 4 autorë janë arrestuar në flagrancë, 23 autorë ndiqen në gjendje të lirë dhe 1 autor është shpallur në kërkim.
Ndërsa në fushën e organizimit të lotarive të palejuara, Policia e Shtetit ka evidentuar 6 raste me 6 autorë, të cilët ndiqen në gjendje të lirë. java/ a.k
