Të gjesh drogë në Tiranë nuk është e vështirë. Mjafton të pyesësh personin e duhur në çdo lagje të saj, që sërish nuk është e vështirë ta gjesh edhe atë. Këtë e tregojnë shifrat që flasin për një numër të lartë personash të proceduar apo të arrestuar në kryeqytet gjatë vitit të kaluar.
“Gjatë vitit 2024, Antidroga e Tiranës ka proceduar 1226 persona, nga të cilët 316 janë arrestuar dhe 18 të tjerë janë shpallur në kërkim”.
Pjesa më e madhe e personave të arrestuar kanë qenë në flagrancë dhe të mbajtur nën vëzhgim për muaj me radhë. Sipas të dhënave, 892 persona janë proceduar penalisht në gjendje të lirë. Kryesisht shpërndarësit vendoseshin në afërsi të lokaleve, por edhe në dyert e shkollave. Për të mos rënë në gjurmët e policisë, në jo pak raste krerët e grupeve kriminale kanë përdorur edhe minorenë për të shpërndarë lëndën narkotike, transmeton A2 CNN.
Gjatë vitit 2024, vetëm në Tiranë janë sekuestruar gjatë operacioneve 18 kg kokainë dhe 129 kg kanabis. Zona e ish Parkut të Autobusëve dhe ish-stacioni i Trenit janë cilësuar si vende të nxehta për policinë. Zona problematike janë edhe ato periferike, si Lapraka, Astiri e Kombinati, shkruan A2 CNN.
Disa nga operacionet më të bujshme dhe me më shumë persona të arrestuar ishin “Tempulli 2”, ku u prangosën 67 persona dhe “Tempulli 4” me lëshimin e 28 urdhër arresteve. Operacione policore të tjera kanë zbuluar dhe disa raste të ndryshme kur trafikantët kanë sjellë në vendin tonë drogë me postë.
Jo pak i bujshëm ishte edhe operacioni i zhvilluar në muajin mars të 2024, ku agjentët iu vunë në ndjekje Enea Sulejmanit që kishte me vete në makinë 1 kg kokainë. I riu për t’i shpëtuar arrestimit tentoi të shtypë oficerët e policisë, ku njëri prej tyre qëlloi për vetëmbrojtje dhe plagosi me armë në këmbë Sulejmanin. Në atë operacion më vonë u zbulua se një agjent i operacionales bashkëpunonte me grupin kriminal të shpërndarësve të drogave të forta.
