Nga protesta e dhunshme e banorëve të Unazës së Re sot paradite para Kuvendit u lënduan 12 efektivë policie dhe 3 qytetarë.
Mësohet se njëra nga efektivet e lënduara ka humbur katër gishtat e dorës si pasojë e hedhjes së kapsollave nga protestuesit.
E plagosura është dërguar në spitalin e Traumës dhe ndodhet nën kujdesin e mjekëve. Ndërkohë që një polic ka humbur dëgjimin, pasi kapsolla e ka kapur në pjesën e qafës.
“Gjatë protestës që përshkallëzoi në akte dhune ndaj forcave të rendit, përballë godinës së sallave plenare të Kuvendit të Shqipërisë janë plagosur 12 efektivë të Policisë së Shtetit. `
Efektivët janë lënduar me mjete të forta dhe piroteknike, hedhur nga tubuesit mbi punonjësit e Policisë, të cilët janë dërguar në spital për ndihmë të specializuar mjekësore, mes tyre dy me dëmtime më të rënda.
Policia e Shtetit u bën thirrje protestuesve dhe përfaqësueve politikë për distancim nga dhuna dhe nga goditjet ndaj punonjësve të rendit” – thotë policia ndër të tjera.
Sot, i plagosur nga protesta mbeti edhe zv.drejtori i Policisë së Tiranës, Dhimitraq Ziu.
/b.d
