Ka vetëm pak ditë që është bërë babai i një djali, e duket se bota ka marrë një tjetër formë e konceptim për reperin Big Basta emri i vërtetë i të cilit është Gerald Xhari. Emocionet e para i ndau përmes një fotoje në Instagram ku i dedikoi Lianit të tij fjalët më të ëmbla, por tashmë që kanë kaluar disa ditë nga lindja e tij reperi flet për herë parë për gazetën Express, për ndjesinë e të qenit baba.
“Është një ndjenjë e papërsëritshme, që çdo prind i ri e përjeton dhe e ka përjetuar. Që nga momenti i parë kur më thanë “Të të rroje djali” …. Pabesueshmërisht e besueshme dhe sidomos kur e shikon çfare mrekullie është gatuar nga dashuria e dy personave,”-shprehet reperi për gazetën Express.
I pyetur se kujt i ngjan më tepër Liani i vogël, Basta është përgjigjur se ndonëse është herët ai është siç e kishin menduar dhe se janë mjaft të lumtur të pozitivë. Por sa i sheh Big Basta rolin e tij të ri atë të babait:
“Çdokush e ka ose do ta ketë një kënaqësi të tille, vetëm se mënyra se si e shikon botën pas lindjes se gjakut tënd, ndryshon krejtësisht. Behësh më i ndjeshëm. Dhe sidomos behësh më i përgjegjshëm.
Çdo gjë kalon në plan të dytë dhe familja fiton pozicion stabël.” Ai është shprehur se aktualisht Vesa ndodhet në Kosovë së bashku me vogëlushin, ku po marrin përkujdesje nga familjarët e Vesës.
Në përfundim të fjalëve të tij të ndjera për gazetën Express, Xhari ka thënë: “Do të jem babai i një fëmije të shëndetshëm dhe një kryevepre dhe burri i gruas më të bukur në botë.”
ma.me
