Whatsapp, aplikacioni më i përdorur për mesazhet në botë, nuk funksionoi për rreth 60 minuta gjatë paradites së sotme në Evropë dhe disa vende aziatike, veçanërisht Malajzi dhe Indonezi. Aplikacioni i komunikimit WhatsApp ka rënë rreth orës 09:00 të mëngjesit.
Gjysma e përdoruesve u ankuan se nuk mund të lidhen me shërbimin. Ndërsa 40 përqind arrinin të hynin në aplikacion, por nuk mund të dërgonin ose të merrnin mesazhe.
“WhatsApp nuk punon dhe të gjithë po shkruajmë në Twitter; nuk mund ta imagjinoj çdo të ndodhte nëse dhe Twitter nuk do të punonte”, shkruante një person në llogarinë e tij në Twitter.
Në shenjë indinjate për mosfunksionimin e rrjetit, shumë njerëz shkruan në facebook #whatsappdown, duke u bërë në pak minuta një temë botërore.
Vetë kompania konfirmoi problemin. Anomalia goditi Europën dhe zona të Malajzisë dhe Indonezisë. Njerëzit nuk mund të fshinin apo të redaktonin foton e tyre, apo të përditësoheshin me informacionet në WhatsApp.
Ndërsa në Amerikë ka raportime për bllokimin e WhatsApp, por në masë më të vogël. Edhe në Shqipëri, përdoruesit e WhatsApp kanë hasur vështirësi në dërgimin dhe marrjen e mesazheve.
javanews/a.ç
