Të ardhurat nga tatimet e doganat kanë shënuar në korrik ndër ritmet më të ulëta të rritjes përgjatë këtij viti. Sipas të dhënave të detajuara të Ministrisë së Financave, në korrik të ardhurat nga tatimet e doganat ishin 29.3 miliardë lekë, me një zgjerim prej vetëm 2.6%, larg rritjes dyshifrore të konstatuar përgjatë disa muajve të mëparshëm.
Duke pasur parasysh inflacionin, që në korrik arriti afër 2 përqindëshit dhe rritjen ekonomike që pretendohet nga qeveria se do arrijë afër 3 përqind, zgjerimi real i të ardhurave rezulton t’i jetë kthyer në korrik ritmeve negative (-2.4%), të konstatuara përgjatë vitit të kaluar.
Ecurinë më negative e ka shënuar TVSH-ja, të ardhurat nga të clat në korrik ishin 11.26 miliardë lekë, me një rënie prej 0.6% në raport me të njëjtin muaj të vitit të kaluar. TVSH është një tregues direkt i qarkullimit të mallrave në ekonomi.
Në rënie kanë qenë dhe të ardhurat nga tatim fitimi, me 5.5%, në 1.59 miliardë lekë, një zë ky që në 6 muajt e parë të vitit kishte pasur një performancë mjaft të mirë, duke udhëhequr rritjen e të ardhurave.
Zëri me ecurinë më të mirë ka qenë akciza, me rritje 7.6% në 4.2 miliardë lekë, si rrjedhojë e shtimit të importit të produktekte të akcizës.
Tatimi mbi të ardhurat personale është rritur me 4.5% dhe taksat nacionale dhe të tjera me 91%.
Të ardhurat nga sigurimet shoqërore janë rritur ndjeshëm me 14.22%.
Të ardhurat jo tatimore janë ulur me 3.6% me bazë vjetore në korrik.
Pavarësisht rezultatit të dobët të korrikut, në total për 7 mujorin të ardhurat nga tatimet e doganat u rritën me 10.3% me bazë vjetore, si rrjedhojë e ecurisë së mirë të muajve të mëparshëm. Gjithsesi, ritmet e rritjes u ngadalësuan, në raport me 12% për 6 mujorin./monitor/a.k
