Pushohet një nga akuzat ndaj deputetit të Partisë Demokratike Astrit Veliaj, i vënë nën akuzë për ndërtim të paligjshëm dhe shkatërrim prone.
Në seancë e dytë gjyqësore pas asaj të datës 13 korrik, Gjykata vendosi të pushojë hetimin gjyqësor ndaj deputetit Veliaj për akuzën e ndërtimit të paligjshëm. Sipas trupit gjykues kjo vepër penale është amnistuar prej muajit gusht.
Por akuzat ndaj Veliajt nuk kanë mbaruar pasi ndaj tij vazhdon gjykimi për akuzën e shkatërrimit të pronës publike. Sipas hetimeve, ka rezultuar se deputeti Veliaj, njëherësh pronari i universitetit “UFO”, ka shkatërruar godinat me vlerë 10.4 milionë lekë të ish-Drejtorisë së Policisë së Fier, dhe mbi rrënojat e tyre ka ndërtuar filialin e universitetit. Objekti 4-katësh me një kullë në mes, është ndërtuar pa pasur lejen ndërtimore të lëshuar nga Bashkia e Fierit.
Deputeti i djathtë mësohet të jetë shprehur pas vendimit të pushimit të akuzës së ndërtimit të paligjshëm, se do të kërkojë shpjegime përse është ngritur ky hetim ndaj tij.
