Nikoll Prenga, një 70-vjeçar mirditor, nuk dorëzohet në betejën e pazakontë me drejtësine që ka nisur prej vitit 2014, duke akuzuar 9 kryeministrat që kanë drejtuar Qeverinë në 25 vite demokraci se kanë shkatërruar pasurinë kombëtare.
Ai është paraqitur këtë të hënë në Gjykatën e Lartë, ku ka ankimuar vendimin e Prokurorisë që ka pushuar kallzimin e tij, me argumentin se nuk ka prova, por sipas 70- vjeçarit provat ekzistojnë.
“Janë shpartalluar të gjithë bazat e industrisë, ekonomisë, është shkatërruar jeta e Shqipërisë, është dhunuar, janë masakruar, ka male me varre të cilat nuk dihen nga politika e papërgjegjshme e shtetit shqiptar”, shprehet ai.
70-vjeçari thotë se nuk është i vetëm në këtë betejë dhe se ka marrë mesazhe nga përkrahës të shumtë.
Ai thotë për Ora News se nuk do të tërhiqet, madje do ta dërgoje çështjen deri në Gjykatën e Hagës:
“Më mirë vonë se kurrë thotë populli. Shpresoj tek drejtësia, kam besim tek Gjykata e Lartë dhe këtë nuk do ta lëshoj deri në Hagë. Me qindra dhe mijëra shqiptarë janë gati të dëshmojnë sepse u ka humbur gjaku, djersa, u është prishur dinjiteti, janë rrugëve, po vdesin njerëzit për bukë, po vdesin fëmijë poshtë urave se nuk kanë strehim, kurse këta bëjnë ahengje”.
Kallzimi i tij u depozitua në Prokurorinë e Përgjithshme në vitin 2014, por pasi u shkqyrtua Prokuroria vendosi pushimin e çështjes me argumentin se nuk ka prova për të vertetuar akuzat e 70-vjeçarit.
Nikoll Prenga ka akuzuar 9 kryeministrat se me mënyrën si kanë drejtuar Qeverinë kanë shkatërruar pasurinë kombëtare.
