Kryetari i Partisë Demokratike Sali Berisha në një deklaratë për mediat është shprehur se denoncon qëndrimet e Kryeministrit Edi Rama për problemet e shqiptarëve që ikin drejt Britanisë së Madhe.
Kryedemokrati Berisha ka thënë se emigrimi i shqiptarëve ne Britani të Madhe është “vepër” e kryeministrit të vendit, Edi Ramës teksa ka shtuar se ikja masive e shqiptarëve diktohet nga kjo qeveri që sipas tij po vret shpresën e shqiptarëve. Berisha shtoi se “Rama po ndërhyn në politikën e brendshme britanike për llogari të këshilltarëve të tij”.
Sali Berisha: Unë sot gjithashtu dua të denoncoj qëndrimet e Edi Ramës ndaj problemeve të mëdha, ndaj dramës shqiptare në kanalin e La Manshit. Autor kryesor i kësaj drame njerëzore është Edi Rama. Janë lidhjet e tij të tmerrshme me korrupsionin, janë vjedhjet e tij në afera qindra milionëshe, janë rrëmbimi i votës, që i bën këta qytetarë të pashpresë në vendin e tyre, janë lidhjet e forta me krimin dhe drogën të Edi Ramës, Olsi Ramës dhe qeveritarëve të tjerë.
Edi Rama është angazhuar në betejë politike në Britani, i këshilluar nga këshilltarë që duan ta shndërrojnë çështjen e brendshme për pikë politike, Edi Rama kalon nga një konferencë në tjetrën, duke përdorur gjuhën ordinere, që tregon se nuk ka minimumin e edukatës njerëzore. Gjuhë që bazohet në urrejtje. Për interesat e tij është i gatshëm që të përdorë çdo fjalë dhe të mbajë çdo qëndrim.
/s.f
