Ish-kryeministri Sali Berisha nëpërmjet një statusi në profilin e tij në Facebook publikoi një denoncim që sipas tij i ka ardhur nga qytetari dixhital. Sipas denoncuesit, miqtë e drejtorit të Policisë së Shtetit trafikojnë afganët në Malin e Zi për 1 mijë dollarë personin.
Ai shprehet se trafiku i klandestinëve bëhet në bashkëpunim me trafikantët duke marrë nga 1 mijë dollarë për klandestin. “I nderuar doktor… Në Malësinë e Madhe në drejtim të pikës kufitare të Hanit të Hotit dhe në pikën kufitare të Muriqanit, ish-drejtori i policisë së qarkut Shkodër, z.Lorenc Panganika, mik i ngushtë i drejtorit të përgjithshëm, z.Haki Çako, në bashkëpunim me drejtorin e kufirit të Shkodrës, z.Qerim Alia dhe Prek Zylën, zv.drejtor i kufirit, si dhe Gaz Demrozin, shef i komisariatit të Shkodrës me Leonard Ndrekën shef i komisariatit të Malësisë së Madhe, të gjithë këta miq dhe të emëruar në detyra nga Lorenc Panganika, kanë organizuar dhe instaluar trafikun e klandestinëve në bashkëpunim me trafikantët në drejtim të Malit të Zi si asnjëherë më parë, duke marrë nga 1 mijë dollarë për klandestin. Të gjitha këto të faktuara nga SHKB-ja dhe SHIK-u.
Lorenc Panganika ditën që është transferuar ka qenë në vëzhgim për t’u arrestuar nga ne grupet speciale që e mbanim në vëzhgim dhe papritur erdhi urdhri që ai nuk do arrestohej”, shkruan Berisha në Facebook.
