Kreu i Partisë Demokratike, Sali Berisha ka deklaruar se forca politike që ai drejton po denoncon farsën elektorale të 11 majit, siç e quajti ai dhe se populli opozitar do të thotë fjalën e tij.
Duke folur në një konferencë për mediat, Berisha tha se rekomandimi i dhënë nga Këshilli i Europës “do të thotë se zgjedhjet janë zhvilluar në kushtet e partisë shtet dhe se në kushtet e partisë shtet nuk ka zgjedhje, por ka farsë”.
“Unë deklaroj? Po më thuaj ti që flet që nuk janë farsë. Atë e ka marrë vesh e gjithë bota që janë farsë. A e more vesh që në raportin që u miratua në Këshillin e Europës nga delegacioni që vëzhgoi zgjedhjet, rekomandimi thotë në Shqipëri të ndahet partia nga shteti. Tani, për çdo njeri që ka minimumin e njohurive elektorale, ky rekomandim do të thotë se zgjedhjet janë zhvilluar në kushtet e partisë shtet dhe se në kushtet e partisë shtet nuk ka zgjedhje, por ka farsë.. ..Tani, siç e shihni jemi në kushtet e një farse të pashembullt elektorale në 32 vite”, u shpreh Berisha.
Ai theksoi se Partia Demokratike ka dokumentuar dhe po dokumenton ‘krimet elektorale’ dhe më pas demokratët do të thonë fjalën e tyre, duke lënë të kuptohet se opozita do t’u rikthehet protestave.
“Besoj se kemi arritur të dokumentojmë dhe po dokumentojmë çdo ditë për shqiptarët dhe institucionet ndërkombëtare dhe partnerët tanë farsën e shëmtuar. Pastaj fjalën do e marrë populli opozitar dhe demokratët. Kjo është… Ajo është një çështje që ka të bëjë, ai nen ka të bëjë kur zhvillohen zgjedhje dhe jo kur zhvillohet farsë elektorale. Në kuptimin që farsat nuk mund të përdoren për mekanizma antiopozitë në një kohë kur ato janë mekanizma thelbësorë antidemokratike. Besoj se e ke të qartë, janë për përmbysjen e sistemit demokratik”, tha me tej Berisha.
