Kreu i Partisë Demokratike, Sali Berisha, do të paraqitet nesër në Prokurorinë e Posaçme për të zbatuar masën e Apelit të GJKKO për “detyrim paraqitje”.
Partia Demokratike ka njoftuar se nesër 20 prill kryetari i saj Sali Berisha do të paraqitet në dyert e SPAK-ut. Në një mesazh të shpërndarë brenda strukturave të PD në Tiranë, u bëhet thirrje degëve të partisë që të mobilizohen dhe të jenë të pranishëm në mbështetje të liderit të tyre.
“Te dashur miq. Nesër ditën e Hënë në orën 9:30 Kryetari i PD Sali Berisha do të jetë në dyert e SKAP-it. Ju lutem të mobilizojmë strukturat e degëve për të qenë të gjithë aty”, thuhet në mesazhin e brendshëm.
Kjo nuk do të jetë hera e parë që mbështetësit e kryedemokratit Berisha do të jenë në mbështetje të tij gjatë paraqitjes në prokurori, pasi kanë qenë të pranishëm edhe më herët kur Berisha është paraqitur për masën e sigurisë.
Në muajin dhjetor, SPAK apeloi në Apelin e Posaçëm lirimin e ish-kryeministrit Sali Berisha nga arresti shtëpiak dhe kërkoi rikthimin e masës. Berisha u lirua në 27 nëntor 2024 pas qëndrimit për rreth 1 vit në arrest shtëpiak, pasi akuzohet si i përfshirë në dosjen “Partizani”.
