Ish-kryeministri Berisha ka marrë fjalën në foltoren e Kuvendit si kundërpërgjigje për deklaratat e ministrit Gjiknuri në lidhje me investimet në energjetikë.
Duke iu drejtuar nënkryetares, Valentina Leskaj, Berisha tha se ajo është bërë personi më i rëndësishëm në Partinë Socialiste pas Edi Ramës. Kjo sipas tij, pasi Leskaj arriti t’i shpëtojë Gjykatës Kushtetuese ndërsa siç tha ai: Arriti t’i hajë kokën Koço Kokëdhimës.
Në përgjigjen e saj Leskaj tha se nuk ish-kreu i PD nuk mund të krijojë diversione me përpjekje të kota, ndërsa Berisha u ndal në çështjen e KESH.
Sipas tij, qeveria e ka shndërruar KESH-in në institucion terrori ndaj qytetarëve shqiptarë.
“Edi Rama ka shndërruar KESH-in në një institucion terrori ndaj qytetarëve shqiptarë dhe në një institucion të vjedhjes dhe gjobvënies më të madhe. Pasi vodhi dhe përvetësoi me fatura 620 milionë euro, vuri në krye të tij familjarin e vet, Çela. E emëroi si bashkëhajdut të sprovuar të Edi Ramës. A ka krim më të shëmtuar sesa të vjedhësh 720 milionë lekë për imazh?” – tha deputeti demokrat.
Berisha tha se humbjet në rrjet janë më të mëdha sesa viti 2013 ndërsa sipas tij janë bllokuar qindra miliarda investime në hidrocentrale nga të huajt. Ai komentoi edhe shkrimin e gazetës Washington Times që e cilëson Ramën si albatros.
“Shtypi prestigjioz e cilëson kreun tuaj si albatros. Ju duket emër i bukur, por albatrosi është zogu i fatkeqësisht” – tha Berisha.
Ai u ndal edhe te votimi i Reformës në Drejtësi ku i bëri thirrje mazhorancës që të pranojë propozimin e PD për nenin 88. Sipas tij, kjo është e vetmja rrugë që opozita ta votojë draftin ose në të kundërt vendit i rrezikohet statusi i kandidatit.
(java / r.a)
